WAKULIMA mbaazi Tunduru waingiza zaidi ya bilioni 10

Imewekwa : September 29th, 2023

Wakulima wa Mbaazi wilaya ya Tunduru  wameingiza zaidi ya bilioni 10 katika mauzo ya zao la Mbaazi kwa njia ya Stakabadhi ghalani, baada ya kufanyika kwa minada mitano ya zao hilo kwa msimu wa 2023/2024.

Akizungumza na waandishi wa habari ofisini kwake Meneja mkuu wa Chama kikuu cha ushirika Tunduru Ndg .Imani Kalembo  Septemba 29, 2023, amesema kwa msimu huu wa mauzo ya zao la Mbaazi  Chama Kikuu kimefanikiwa kufanya minada mitano, ambapo  tani zisizopungua 5,000 zimeuzwa katika minada hiyo, na kufanya zaidi ya shilingi bilioni 10 kuingia katika mzunguko wilayani Tunduru.

“kumekuwa na ongezeko kubwa la bei kwa msimu huu wa mbaazi  ukilinganisha na msimu uliopita 2022/2023” Alisema   “Ambapo bei ya wastani ilikua shilingi 868 ukilinganisha na msimu huu ikiwa shilingi 1,998”

Aidha, Meneja  Kalembo amepongeza na kushuru jitihada zinazo endelea kuoneshwa na Serikali ya awamu ya sita chini ya Rais wa Jamhuri ya Muungano wa Tanzania Mhe.Dkt, Samia Suluhu Hassan Pamoja na Waziri wa kilimo Mhe.Hussein  Bashe,  katika kuhakikisha kuwa wakulima wananufaika na mfumo huu wa Stakabadhi ghalani kwa kuondoa wanunuzi wa kati wa mazao hayo machanganyiko ,pia amemshukuru kwa dhati Mkuu wa wilaya ya Tunduru Mhe.Wakili, Julius S. Mtatiro kwa kujitoa kwake kuwatetea wakulima wa mazao hayo ya Ufuta,Mbaazi na Korosho.

Meneja Kalembo  amesema matarajio ya Chama Kikuu  cha Ushirika Tunduru ni kukusanya zaidi ya tani 8,000 kwa msimu ujao wa zao la mbaazi, kutokana na mikakati iliyowekwa na kuahidi kuzalisha mazao yaliyo bora  ya Stakabadhi ghalani ikiwemo Ufuta, Mbaazi  na Korosho.

Msimu huu wa 2023/2024 kwa upande wa zao la Ufuta,  Chama Kikuu cha Ushirika Tunduru kilikusanya zaidi ya tani 4000, ikiwa ni zaidi ya ukusanyaji wa zao la Ufuta kwa msimu wa 2022/2023, ambapo kwa msimu wa 2023/2024 zao hilo limewaingizia wakulima zaidi ya shilingi  bilioni 17.

Imeandaliwa na Orpa Kijanda, Kaimu Mkuu Kitengo cha Mawasiliano Serikalini.