UBORESHAJI miundombinu Elimu ya Awali Tunduru.

Imewekwa : September 7th, 2023

Ujenzi wa darasa lililopo katika Shule ya Msingi Mchangani umefanikiwa, ambapo darasa moja lenye vyumba viwili vya awali na matundu sita ya vyoo vimekamilika kupitia mradi wa kuboresha miundombinu ya Elimu ya Msingi (BOOST). Hii ni hatua kubwa katika kuboresha elimu na miundombinu ya Shule katika eneo hilo.

Ujenzi huu umefanyika kwa mafanikio makubwa kutokana na jitihada za Serikali ya kuimarisha miundombinu ya elimu. Shule hii ya awali itakuwa na madarasa yanayojitosheleza na vyoo vya kutosha, yote yamezingatia viwango na mahitaji ya shule za awali.

Umuhimu wa ujenzi wa shule hii umepewa kipaumbele na ndio maana ulikamilishwa kwa kipindi kifupi cha siku 90. Serikali imeonesha dhamira ya dhati katika kuhakikisha wanafunzi wetu wanapata mazingira bora kwa ajili ya kujifunza na kuendeleza vipaji vyao.

Ujenzi huu umegharimu jumla ya milioni 66.3 ambazo zimetumika kwa ufanisi mkubwa. Fedha hizi zimeelekezwa kwa ajili ya kununua vifaa vya ujenzi na malipo ya wafanyakazi waliohusika katika ujenzi huo, kuhakikisha kuwa ubora wa miundombinu ya shule umefikiwa.

Kumalizika kwa ujenzi wa shule hii ni habari njema kwa wazazi na wananchi wa kata ya Mchangani. Shule ya awali itawapa fursa watoto kuanza safari yao ya elimu katika mazingira mazuri na yenye rasilimali za kutosha.