MKUU wa TAKUKURU Tunduru atoa wito wa kupambana na rushwa.

Imewekwa : July 26th, 2025

Mkuu wa Taasisi ya Kuzuia na Kupambana na Rushwa (TAKUKURU) Wilaya ya Tunduru, Ndugu George Njogolo, amewaasa wananchi wote kushirikiana kikamilifu katika kuzuia na kutokomeza rushwa, akisisitiza kuwa rushwa ni adui wa haki. Kauli yake inalenga kuhamasisha jamii kutambua madhara ya rushwa na kuchukua hatua madhubuti dhidi yake.

Ndugu Njogolo amesisitiza kuwa jukumu la kuzuia rushwa si la TAKUKURU pekee, bali ni la kila mwananchi. Akitoa kauli mbiu ya TAKUKURU, amezungumza kuwa, "Kuzuia rushwa ni jukumu lako na langu, tutimize wajibu wetu." Hii inaashiria kuwa mapambano dhidi ya rushwa yanahitaji ushiriki mpana kutoka kwa kila mmoja wetu.

Amesisitiza kuwa wajibu wa mwananchi ni kuhakikisha anatoa taarifa mara tu anapoona kuna viashiria vya rushwa. Ndugu Njogolo amewaasa wananchi kutofumbia macho vitendo hivi na badala yake kuviripoti kwa vyombo husika ili hatua za kisheria ziweze kuchukuliwa. Kutoa taarifa ni hatua muhimu katika kuwafichua na kuwadhibiti wala rushwa.

Aidha, amewataka wananchi kuwa makini sana katika kipindi hiki cha kampeni kuelekea Uchaguzi Mkuu wa mwaka 2025. Ndugu Njogolo amesisitiza kuwa kupata kiongozi aliye bora hakupatikani kwa njia ya rushwa. Ameshauri wananchi kuchagua viongozi kwa kuzingatia uadilifu, uwezo, na vigezo vingine vya uzalendo, badala ya kushawishiwa na maslahi binafsi au zawadi za rushwa.