Rais Magufuli Ampa Maagizo Mkuu wa Mkoa wa Ruvuma

Imewekwa : April 5th, 2019

Rais wa Jamhuri ya Muungano wa Tanzania Dkt.John Pombe Magufuli,

ametoa maagizo kwa Kaimu Mkuu wa Mkoa wa Ruvuma Godfrey Zambi ambaye

pia ni Mkuu wa Mkoa wa Lindi, kuhakikisha ndani ya siku tano soko la

Kata ya Nakapanya wilaya ya Tunduru mkoani humo linafungliwa na kuanza

kutoa huduma kwa  wananchi.

Maagizo hayo aliyatoa jana wakati akizungumza na wakazi wa kata hiyo

muda mfupi baada ya kuwasili mkoani humo kwa ziara  ya kikazi ya siku

tano akitokea mkoa wa Mtwara.

Rais Magufuli alifikia maamuzi hayo baada ya wananchi kutoa kilio chao

cha muda mrefu cha kukosa sehemu ya kufanyia biashara huku wakiwa na

jengo ambalo lilishajengwa kwa kipindi cha miaka saba iliyopita,kwa

madai kuwa jengo hilo lipo karibu na kituo cha Mahakama ya mwanzo.

“Mkuu wa mkoa nataka ndani ya siku tano jengo hili liwe limefanyiwa

uboreshwaji na lianze kutumika ili kuwaondolea adha wananchi waliokuwa

wakiipata kwa muda mrefu sasa”alisema Rais Dkt.John Magufuli.

Aidha katika hatua nyingine Rais Magufuli aliutaka uongozi wa Mahakama

Wilaya ya Tunduru kutafuta eneo lingine la kujenga kituo cha Mahakama

ili kuacha huru eneo hilo kwa shughuli za biashara.

Magufuli ambaye alilazimika kutembelea eneo hilo la soko pamoja na

jengo la kituo cha Mahakama ya mwanzo Nakapanya,ambapo alisema kuna

kila sababu ya kujenga kituo kipya cha Mahakama kutokana na jengo la

awali kuwa na uchakavu.

Hata hivyo akiwa kwenye majengo hayo alitoa shilingi milioni kumi huku

viongozi mbalimbali wakiwemo wabunge walichangia milioni 12 na kufanya

jumla ya shilingi milioni 22 kwa ajili ya ujenzi wa kituo kipya cha

Mahakama.

 Mwisho.