HALMASHAURI zote nchini zatakiwa kusimamia mapato

Imewekwa : September 27th, 2018

WAZIRI Mkuu wa Jamhuri ya Muungano wa Tanzania Mheshimiwa Kassim M. Majaliwa (MB) ametoa rai kwa Madiwani, Wakurugenzi na Makatibu Tawala wa Mikoa  kubadilisha mtazamo  katika suala zima  la usimamizi, ukusanyaji na  utumiaji  wa fedha  zinazokusanywa kwenye Halmashauri zote nchini

Akifungua Mkutano Mkuu wa 34 wa Jumuiya ya Tawala za Mitaa Tanzania (ALAT) uliofanyika leo katika ukumbi wa Jakaya Mrisho Kikwete Jijini Dodoma. Mhe. Majaliwa amesema ustawi wa jamii unategemea uwezo wa mapato yake na matumizi yenye tija kwa fedha zinazokusanywa

Mhe. Majaliwa amefafanua kuwa lengo la Serikali ni kuhakikisha Halmashauri zinakuwa na uwezo wa kujitegemea kimapato kwa zaidi ya asilimia 80 ifikapo mwaka 2025 ili kutimiza lengo la Serikali katika Dira ya Maendeleo ya 2025.

Amesema kuwa Serikali ya awamu ya Tano imekuwa ikichukua  hatua mbalimbali  ili kuhakikisha dira ya maendeleo ya mwaka 2025 kwa kuanzisha  utaratibu wa kugharamia  miradi  ya kimkakati  yenye lengo  la kuziongezea Halmashauri mapato  ya uhakika  na kupunguza utegemezi  wa ruzuku  ya Serikali.

Mhe. Majaliwa amesema kuwa  hadi sasa Serikali  imeidhinisha shilingi bilioni 131.5 kutekeleza miradi ya  ipatayo 22 katika Halmashauri  17 zilizokidhi vigezo kwenye Mikoa 10 na mpaka sasa kiasi cha shilingi bilioni 16.4 zimepelekwa kwenye Halmasahauri  hizo kwa ajili ya kuanza utekelezaji wa  miradi ya kimkakati.

Amaesema kuwa  uchambuzi wa miradi  mingine ya kimaendeleo  unaendelea na Halmashauri  zitakazokidhi vigezo zitapata fedha kwa  ajili ya utekelezaji wa miradi hiyo na amezitaka Halmashauri zote nchini  kutumia fedha  hizo kwa ajili ya  malengo yaliyokusudiwa.

“ Serikali  haitakuwa  na utaratibu wa kutoa fedha bila kufahamu kwa kina fedha hizo zinakwenda kufanya nini na zinaleta mabadiliko gani kwa kuwa nimesikia kwamba katika baadhi ya Halmashauri fedha zilizokwishatolewa bado hazijaanza kutumika kikamilifu, nawaagiza Waheshimiwa Madiwani kusimamia matumizi ya fedha hizo ili Halmashauri  zipate miradi yenye ubora unaotakiwa na inayokamilika kwa wakati” Anafafanua Majaliwa.

Mhe. Majaliwa amesema Serikali imeongeza ukusanyaji wa mapato  katika Mamlaka za Serikali za Mitaa kwa kuhakikisha Halmashauri zote 185 zinatumia Mfumo wa ukusanyaji wa mapato wa Mamlaka za Serikali za Mitaa na kufanya ongezeko la mapato kutoka shilingi bilioni 379 kwa mwaka 2014/2015 hadi kufikia  shilingi bilioni 553.39 kwa mwaka wa fedha 2017/2018 .

Amewaonya Viongozi wa Halmashauri wanaolalamikia kutokuendelea kulalamika  kuhusu baadhi ya vyanzo  vya mapato  kuchukuliwa na Serikli  kuu bali  waongeze  bidii  na ubunifu  katika kutafuta  vyanzo vipya vya  mapato ili Mamlaka za Serikali za Mitaa  ziweze kujitegemea.

“Fanyeni kazi  ionekane, tusione Mamlaka  za Serikali za Mitaa ambazo kweli zinatoa huduma, tuone vyumba vya madarasa vinaongezeka, watoto hawakai chini, Zahanati zinazopendeza  hapo tunaweza  kusema sasa  Halmashauri zimekomaa” Amefafanua Mhe. Majaliwa

 Wakati huo huo Waziri wa Nchi Ofisi ya Rais Tawala za Mikoa Mhe. Selemani Jafo amewaagiza Wakurungenzi wa Halmashauri kuacha kufanyakazi kwa mazoea bali wafanye kazi kwa bidii kwa kutumia weledi ili  kuleta mabadiliko katika utendaji kazi katika Halmashauri

Aidha Mhe. Jafo amewaagiza Wakurugenzi wa Halmashauri zote nchini kuhakikisha wanatenga fedha kwa ajili ya kuwakopesha wanawake, vijana  na watu wenye ulemavu ili kuwawezesha kiuchumi  na kupunguza umaskini  nchini.

Imetolewa na tovuti ya TAMISEMI

Septemba 27,2018