DC amsimamisha kazi Meneja Namsosa AMCOS

Imewekwa : November 2nd, 2023

Mkuu wa wilaya ya Tunduru,Mhe. Wakili, Julius S. Mtatiro amemsimamisha kazi Bwana. Zawadi Mwalimu ambaye ni meneja wa Chama Cha Ushirika cha msingi (AMCOS) cha Namsosa, kilichopo kata ya Namakambale.

Akizungumza katika ufunguzi wa minada ya korosho uliofanyika November 02, 2023 katika kata ya Nakapanya, AMCOS ya Namitili, Mhe. Mtatiro alisema kwamba meneja huyo amebainika kuvunja miongozo, sheria pamoja na kanuni za ushirika, hivyo amekosa sifa ya kuendelea kusimamia shughuli zote zinazoendelea katika chama cha Msingi hicho.

 “Ninamsimamisha kazi meneja huyu leo hii, ameshindwa kusimamia na kufuata miongozo,sheria na kanuni za ushirika”. Alisema “Tunataka kuhakikisha kwamba mameneja na watumishi wote wa vyama vya msingi wanawajibika ipasavyo kiudadilifu kwa ajili ya manufaa ya wakulima na wananchi wa Tunduru”.

Mh. Mtatiro aliagiza meneja huyo kukabidhi ofisi na nyaraka zote muhimu mara moja, na majukumu yake amkabidhi meneja msaidizi. Aidha, aliagiza meneja huyo afike ofisi ya Mkuu wa Wilaya asubuhi ya tarehe 03.11.2023 bila kukosa.

Imeandaliwa na Orpa Kijanda, Kaimu Mkuu wa Kitengo cha Mawasiliano Serikalini Halmashauri ya Wilaya ya Tunduru.